Шәкертләр "Сабан туе" 2022

  31 нче июль көнне Кайбыч районы мөхтәсибәтендә укучы балалар өчен «Сабан туе» бәйрәме оештырылды. Әлеге чарада җәйге каникулларда рухи саләмәтләндерү үзәкләрендә 18-30 июль көннәрендә укып йөргән балалар, имамнар, укытучылар һәм Кайбыч районы хакимият башлыгы Рахматуллин Альберт Илгизәр улы катнашты. Бәйрәмдә балалар чүлмәкләр ваттылар, йөгерделәр, капчык киеп йөгерделәр һәм мәхәллә исеме өчен аркан тарттылар. Нәни балалар өчен къбек чыгаргычлар таратылды һәм башка мавыктыргыч уеннар оештырылды.

     Быел Кайбыч районының ун өч мәхәлләсендә Борындык, Шүшермә, Колангы, Олы Урсак, Мөрәле, Югары Кошман, Түбән Кошман, Олы Кайбыч, Кече Кайбыч, Бәрлебашы, Ябалак, Иске Чәчкаб, Чүти авылларында  рухи саләмәтләндерү үзәкләре эшләде. Әлеге үзәкләрдә 250 бала ял итте һәм дини белемнәрен арттырды. Дәресләрне җирле имамнар һәм мәхәллә укытучылары алып барды һәм Казан шәһәре “Мөхәммәдия”, Буа шәһәре мәдрәсәсеннән, килгән сигез шәкерт ярдәм итте. Шәкертләр Колангы, Борындык, Олы Кайбыч, Кече Кайбыч, Бәрлебашы, Иске Чәчкаб, Чүти авылларында дини практикаларын узып имамнарга ярдәм иттеләр. Кайбыч районы мөхтәсибәте әлеге чараны оештыруга ярдәм итүче Татарстан Диния нәзарәтенә, Кайбыч районы администрация башлыгы Рахматуллин Альберт Илгизәр улына,  Җәләлиев Равил Гәрәфетдин улына, Гыйбадуллин Айдар Альберт улына,   олы рәхмәтләрен белдерә. Шулай ук оештыру эшләрендә ярдәм кулы сузучы Кайбыч районы мәдәният йортына, спорт үзәге хезмәткәрләренә, имамнарга, укытучыларга,  һәм шәкертләргә дә олы ихтирамын һәм рәхмәтен белдерә.